Global Graphene Call, grafenoarekin zerikusia duten enpresa-ideiak
CIC nanoGUNEk, BerriUp-ek —Donostiako startupen azeleragailua— eta Grapheneak —grafenoa ekoizten eta merkaturatzen duen nanoGUNEko lehen startup-a— lankidetza-hitzarmen bat sinatu dute grafenoaren ikerketarekin lotutako proposamenak bultzatzeko. Horretarako, Global Graphene Call izeneko deialdia jarri dute martxan lehen aldiz, grafenoarekin lotutako enpresa-ideiak garatzeko.
“Grafenoari buruzko ezagutza handia dago gure lurraldean, hein handi batean nanoGUNE eta Grapheneari esker. Material horri lotutako ekosistema bat eraikitzen jakin dugu eta Euskal Herria arlo horretako munduko liderren artean kokatu dugu. Horrenbestez, grafenoaren inguruko ekimen berri honekin ekimen berritzaile berriak erakarri nahi ditugu —enpresa-proiektuak edo produktu-garapenak—, grafenoaren alorrean sortu dugun ekosistema aberasten jarraituko dutenak Euskal Herrian”, adierazi du Jose María Pitarke nanoGUNEko zuzendari nagusiak.
Jesús de la Fuente Grapheneko zuzendari exekutiboak grafenoa erabiliz aplikazioren bat garatu nahi duten ekintzaileei laguntzeko ilusioa du. “Grafenoaren sintesian eta material aurreratuen komertzializazioan dugun esperientzia eskain dezakegu. Grafenoan oinarritutako gailu edo teknologia bat abiaraztea erronka berritzaile handia da, baina denbora asko behar du garatzeko eta inbertitzeko. Horregatik, deialdi hau aukera bikaina da material horietan oinarritutako aplikazioren bat errealitate bihurtu nahi duen pertsona edo talde batentzat”, erantsi du.
Lehenengo aldia da nanoGUNE eta Graphenea BerriUp-ekin elkartzen direla deialdi berria antolatzeko. “Gure lurraldera negozio-eredu, proiektu edo startup berriak erakartzen laguntzeko modu bat dela uste dugu, azeleragailu gisa sektorearentzat ona dela uste baitugu”, nabarmendu du Patricia Casado BerriUp-eko zuzendariak.
Hiru erakundeek bat egiten dute ekimen-mota horiei eskaintzeko asko dutela esaterakoan: BerriUp-ek eskaintzen duen azelerazio-metodologia, Grapheneak eskaintzen duen grafeno-produktuen sorta, eta nanoGUNEk duen azpiegitura eta puntako ekipamendua. “Konbinazio horrek gure lurraldera proiektu berriak bultzatzeko eta erakartzeko osagai guztiak dituela uste dugu”, ondorioztatu dute.
Parte-hartzaileek beren proiektuak eta egiazkoak aurkeztu beharko dituzte, eta parte hartzeko beharrezkoa da proiektua osorik erregistratzea horretarako prestatutako inprimakian. 2020ko apirilaren 26ra arteko epea dago proiektuak bidaltzeko.
Hautatutako finalistek azelerazio pertsonalizatuko programa bat izango dute BerriUp-en egoitzan, 2020ko ekainetik abuztura bitartean. Halaber, Graphenea materiala eskuratzeko eta nanoGUNEren ekipamendu zientifikoa erabiltzeko aukera izango dute.